O Nadal resultou todo un éxito no Castelo de Soutomaior, onde se esgotaron as entradas para as actividades organizadas.
Estas datas de Nadal supuxeron confirmar o éxito deste destino durante todo o mes de decembro, pois preto de 3.200 persoas visitaron o castelo durante o último mes do ano.
Unhas 2.000 persoas acudiron aos xardíns para gozar da iluminación e do espectáculo de videomapping proxectado na Torre da Homenaxe.
Os datos forman parte do balance relizado pola Deputación Provincial, que destaca o éxito das actividades programadas no Castelo de Soutomaior polo Nadal.
As visitas teatralizadas foron, un ano máis, unha das actividades estrela e esgotaron todas as prazas en todas as quendas. Así, asistiron 720 persoas nos 24 pases programados.
Os contacontos 'Un ratiño na cidade' e 'Unha carta para os Reis Magos' tamén completaron as súas prazas, o que suma outras 120 persoas que se achegaron ao castelo durante as festas.
Tamén destacan o éxito do xogo de escapismo no que se recreou o asalto ao castelo do século X, que tamén obtivo unha moi alta ocupación. Aínda está en marcha e rematará coas últimas quendas previstas esta fin de semana, para as que están xa esgotadas as entradas.