O subdelegado do Goberno en Pontevedra, Abel Losada, anunciou que o Goberno de España "vén de sumar unha inversión máis" na cidade de Pontevedra co cambio de cuberta na residencia loxístico-militar Virxe Peregrina.
A obra foi adxudicada por un importe de 184.876 euros á empresa Prosema Noroeste, que deberá facerse cargo da retirada da cuberta antiga e a colocación dunha nova.
A intervención permitirá eliminar as filtracións de auga existentes e mellorar a eficiencia enerxética do edificio. Esta actuación súmase ao contrato xa formalizado no mes de xuño que permitirá a construción de novos aseos accesibles na planta baixa da residencia.
O subdelegado do Goberno lembrou que o Ministerio de Defensa vén de licitar no que vai de ano diferentes actuacións por un importe superior ao millón e medio de euros na cidade para, entre outros, asfaltar o aparcamento exterior da Base Xeneral Morillo, mellorar o peche da súa nave de mantemento de canóns, reparar a cuberta da súa cociña-comedor ou ampliar os seus vestiarios. Pola súa banda na Escola Naval Militar de Marín aprobáronse as actuacións de mellora do equipamento das súas residencias, do seu material deportivo e de adecuación das súas infraestruturas.
Así mesmo, recordou que o Executivo ten en marcha a creación dun centro de educación infantil na Base Xeneral Morillo e as obras de desdobramento das vivendas de Rosalía de Castro.
"Actuacións que en conxunto superan os 5 millóns de euros e que sumadas a todas as inversións que o Goberno de Pedro Sánchez ten en marcha nesta cidade evidencian a súa aposta decidida polo municipio e pola provincia de Pontevedra", manifestou Losada.