A Oficina Municipal de Información ás Persoas Consumidoras (OMIC) de Bueu presentará unha demanda colectiva para a reclamación dos gastos hipotecarios.
Nunha rolda de prensa celebrada nas dependencias da OMIC na que estiveron presentes Félix Juncal, alcalde de Bueu, Manuela Millán, encargada do servizo, e Iván Castro, do Despacho de Calixto Escariz, anunciaron que a demanda se presentará "proximamente" e permitirá "recuperar ata medio millón de euros e chegar a 400 persoas".
Juncal salientou que "a aposta que fixemos no seu momento pola apertura desta oficina de atención ás persoas consumidoras, mostrouse como moi favorable, pois é un servizo que presta axuda, asesoramento e mediación e que permite defender ás persoas máis vulnerables nestes tempos de desprotección".
Con esta demanda, o obxectivo do goberno local é reclamar de forma colectiva os gastos hipotecarios, nos que estarían recoñecidos a totalidade dos gastos de rexistro, taxación e xestoría, e a metade dos de notaría. Segundo estiman dende a OMIC, estes gastos poden supoñer arredor de 1.200 euros por cada reclamante.
DATOS DO 2023
Durante o pasado ano, a Oficina de consumo de Bueu tramitou preto de 300 expedientes de reclamación, dos cales se recuperaron 132.209,97 euros para as persoas usuarias.
Segundo o informe do pasado ano, tramitáronse 68 expedientes de reclamacións en telecomunicacións; 58, de luz, gas e auga; 43, de bancos; 26, de seguros; 15, de viaxes; 10, de comercio online, 8, de automoción; 4, de comercio en tenda; 1, en saúde; e 19, noutros epígrafes non encadrables nos anteriores.
A estes datos habería que engadir o Bono Social Eléctrico, un plan de asesoramento e aforro na factura da luz e a fin de evitar desprazamentos ás persoas usuarias ás oficinas das comercializadoras reguladas noutros municipios. Destes expedientes tramitáronse un total de 46, o que supoñen 36.800 euros recuperados para as persoas usuarias.
Os datos dos dous anos anteriores indican que as reclamacións máis habituais son as de telecomunicacións, seguidos de luz, gas e auga, os bancos e os seguros.
Dado o interese para a cidadanía, o alcalde salienta que "estamos moi satisfeitos co funcionamento do servizo e de cara ao futuro potenciarémolo máis, con maior persoal e charlas de formación para a cidadanía.