Xa o avisara Raimundo González, coordinador local do BNG. O "cerme" do actual grupo municipal nacionalista ía acompañar a Miguel Anxo Fernández Lores na candidatura ás próximas eleccións municipais de maio. E así será. Só un dos seus concelleiros non repetirá en postos de saída. Trátase de Miguel Filgueira, responsable de Mobilidade e Sanidade Animal, que quedou relegado ata o posto 24 da lista.
Segundo informa Serafín Alonso no Diario de Pontevedra, a lista do BNG contará nos postos de saída coa única novidade de Anabel Gulías, presentada o pasado sábado como número 2 de Fernández Lores. O seguinte na lista será o edil de Rural e Xuventude, Demetrio Gómez Junquera, que é promovido polos nacionalistas e ascende do décimo posto en 2011 ao terceiro que ostentará nas próximas eleccións.
Carme da Silva e Luis Bará, concelleiros de Festas e Seguridade Cidadá e de Patrimonio Histórico respectivamente, serán o 4 e o 5 na lista do BNG, escalando tres postos con respecto ás últimas eleccións. Son precisamente os mesmos que ceden Anxos Riveiro, César Mosquera e Raimundo González, responsables por esa orde de Cultura, Ordenación do Territorio e Facenda, que ocuparán do 6 ao 8 nesta candidatura.
O BNG, que actualmente conta con once edís na corporación, cubrirá o resto dos postos de saída ata ese punto, con Carmen Fouces, Vicente García Legísima e Pilar Comesaña, concelleiros de Benestar Social, Persoal e Patrimonio e Sanidade respectivamente.
Esta candidatura, que incorporará numerosas novidades a partir destes once primeiros postos, será aprobada o sábado durante o Consello Nacional do BNG que se celebrará en Santiago de Compostela.