O presidente da Deputación de Pontevedra, Luís López deu conta este venres do contido da Xunta de Goberno na que "aprobamos preto de 7 millóns de euros para o impulso do destino Rías Baixas, medidas de benestar social, cultura e infraestruturas".
En concreto, a Deputación acordou a contratación dos "workshops" con actores turísticos para promocionar o destino Rías Baixas, cun orzamento de 170.000 euros.
Trátase dunha iniciativa "de grande éxito" que permite que as empresas pontevedresas se poñan en contacto con profesionais de zonas emisoras de visitantes.
Este venres habilitouse o crédito para que unha empresa localice que cidades españolas de fóra de Galicia axústanse mellor ás necesidades da promoción.
Esta proposta vaise a facer en base á análise do perfil do turista das Rías Baixas e tamén a posibilidade real de que aumente o número de visitantes procedentes deses mercados.
A empresa adxudicataria tamén se vai a encargar da xestión dos eventos, da escenografía, da coordinación dos asistentes ou as propostas gastronómicas, entre outras tarefas.
Nesta Xunta de Goberno tamén se aprobaron as bases da nova edición do programa Mais Benestar de "termalismo social", que estará dotado no ano 2026, con máis de 220.000 euros.
É un programa dirixido a persoas maiores de 55 anos, xubilados e pensionistas da provincia. Serán 2.127 prazas, das que 2.097 son en réxime xeral subvencionadas con 100 euros e 30 en réxime especial subvencionadas con 400 euros. O programa busca fomentar o envellecemento activo e a independencia dos maiores.
A Deputación tamén pon en marcha unha nova liña de axudas, das que hoxe foron aprobadas as bases, dotadas con 600.000 euros para que as entidades sociais poidan realizar obras nas súas instalacións.
O goberno provincial tamén deu luz verde ás bases do programa Culturea, dotado de 1,2 millóns de euros para financiar actuacións de artistas e grupos nos concellos da provincia no ano 2026.
Con este programa a Deputación pon o seu catálogo a disposición de asociacións, entidades locais menores. En 2025 programáronse máis de 3.500 actuacións dentro deste programa.
O último asunto aprobado polo goberno provincial foron actuacións nas estradas provinciais con vías localizadas nos municipios de Portas, Vilanova, A Estrada e Forcarei nas que se fará un investimento global de preto de 3,7 millóns de euros.
No caso da EP-7001, A Estrada-Forcarei, vaise a repoñer o firme (o investimento previsto é de 1 millón de euros), na EP-9703 Vilanova de Arousa-Ponte Arnelas e na EP-9701 Baión- András mellorarase a seguridade viaria (1,3 millóns de euros) e na EP-8101 Portas-Romai ensancharase e acondicionarase esta vía (1,4 millóns).
"Con estas tres obras seguimos consolidando o noso firme compromiso coa modernización das estradas provinciais, como xa vimos demostrando nestes 2 anos e medio e como seguiremos demostrando o próximo ano", concluíu Luís López.