A Deputación de Pontevedra vén de publicar no Boletín Oficial da Provincia a convocatoria para cubrir o posto de dirección do Museo de Pontevedra.
Quen queira presentarse deberá ser funcionario de carreira do grupo A1 e achegar un proxecto de dirección de ata 20 páxinas, no que se expliquen as liñas principais que se queren desenvolver no museo. O prazo para enviar solicitudes está aberto durante quince días, a partir deste mesmo martes.
A persoa elixida será a encargada de pilotar o rumbo do museo, traballando da man do deputado provincial responsable da área —actualmente o vicepresidente Rafa Domínguez— e seguindo os procedementos da Deputación e a normativa vixente.
A selección correrá a cargo dun tribunal técnico composto polo secretario da Deputación, a xefa do Servizo de Recursos Humanos e Formación, e o xefe do Servizo de Cultura. Teranse en conta aspectos como a formación académica, os coñecementos en museoloxía, a experiencia previa en cargos con responsabilidade e o traballo en centros culturais con variedade de coleccións.
CRÍTICAS DO BNG NO PLENO PROVINCIAL
O portavoz provincial do BNG, César Mosquera, esixiu no pleno do pasado 31 de xullo á Deputación que resolvese inmediatamente a situación de "ilegalidade" na que está a Dirección do Museo. O nacionalista sinalaba que Ángeles Tilve leva á fronte da institución dende setembro de 2023, contravindo a Lei de Emprego Público de Galiza que limita a un máximo de seis meses as funcións de carácter temporal. "Hai unha situación manifestamente irregular", advertiu o voceiro nacionalista.
Mosquera lembrou que a actual responsable do Museo foi nomeada oficialmente en Pleno o 29 de setembro de 2023 por un prazo de tres meses. Entón, o responsable do Bloque xa indicara que ao non ter a praza en propiedade e ser nomeada "de maneira provisional e a dedo" -sen ter pasado por un concurso público por concorrencia competitiva e ser outras as súas funcións-, Tilve ía estar nunha situación "precaria". Así mesmo, destacara que ía carecer de autonomía e de capacidade para tomar decisións xa que, realmente, "quen quería exercer de director ‘de feito’ era o propio vicepresidente Domínguez".
O voceiro do PP Jorge Cubela, anunciou ese mesmo día que a Dirección do Museo ía cubrirse por medio do procedemento regulamentario nun breve espazo de tempo.