A Deputación de Pontevedra dá por perdida a subvención de tres millóns de euros do Programa de Impulso á Rehabilitación de Edificios Públicos (PIREP) dos fondos europeos Next Generation concedida en marzo de 2023 para realizar as obras dos edificios históricos do Museo, o Castro Monteagudo e García Flórez.
Este proxecto fora un dos 181 seleccionados de entre os 1.020 presentados conseguindo o máximo subvencionable para as "obras de consolidación, restauración e interconexión mediante o subsolo" dos edificios centrais do Museo de Pontevedra, situados na Praza da Leña.
O vicepresidente da Deputación de Pontevedra, Rafa Domínguez, desvelou que "cando os pediron sabían que os ían a perder".
"Desde que chegamos aquí, o que nos dixeron os servizos de arquitectura, é que era imposible telos" polo que xa se dan por perdidos estes fondos europeos que axudarían a financiar unha obra orzada inicialmente en 12 millóns.
Ademais, o obxectivo do goberno provincial de que esta rehabilitación dos edificios históricos estivese concluída no ano 2027 coincidindo co centenario da creación do Museo a día de hoxe parece moi difícil, aínda que "imposible non", asegurou Domínguez.
O vicepresidente da Deputación de Pontevedra denunciou en rolda de prensa as "mentiras reiteradas" que, ao seu xuízo, difundiron do portavoz do BNG e ex vicepresidente da Deputación, César Mosquera, e o alcalde de Pontevedra, Miguel Anxo Fernández Lores, sobre a situación administrativa dos edificios históricos do Museo.
"Véxome obrigado a saír a desmentir", xustificou Rafa Domínguez a comparecencia deste mércores na que sinalou o "nerviosismo" existente no Bloque debido a que "a posición do Partido Popular en Pontevedra é absolutamente crecente, está próxima, si non alcanzamos xa, a maioría absoluta", polo que, "ven obrigados a atacarme", dixo o líder da oposición no Concello de Pontevedra.
"Fronte a unhas obras que Lores e Mosquera situaron como inminentes, nós o que nos atopamos foi un proxecto básico con faltas de rigor, erros e omisións; un proxecto insuficiente que non tiña o visto e prace de Patrimonio, nin licenza municipal, e unhas obras sen licitar, sen adxudicar e sen contratar", manifestou Rafa Domínguez.
A día de hoxe a administración provincial segue a agardar desde o pasado mes de febreiro pola autorización da Dirección Xeral de Patrimonio para o proxecto de rehabilitación dos edificios Castro Monteagudo e García Flórez, que levan xa once anos pechados ao público.
O vicepresidente da Deputación de Pontevedra reiterou que cando o Partido Popular chegou ao goberno provincial atopáronse cun proxecto que era moi básico e que "o señor Mosquera tiña no seu despacho" e os servizos de arquitectura da Deputación non coñecían, "algo que é absolutamente estraño e inusual", dixo.
Rafa Domínguez sostivo que co PP no goberno provincial "normalizamos a situación" para que os servizos de arquitectura puidesen ter un "control efectivo" deste proxecto de rehabilitación, constatando que "o arquitecto que escolleu o señor Mosquera fixo un gran traballo" polo que "ese arquitecto seguiu traballando connosco, con outra administración".
Segundo reiterou o vicepresidente da Deputación, cando asumiu este proxecto faltaba a autorización de Patrimonio, tampouco tiña licenza municipal, nin estaba licitado polo que desmente que as obras nos edificios centrais fosen "inminentes", como se anunciou.
Rafa Domínguez desvelou que a resposta da Dirección Xeral de Patrimonio sobre o proxecto básico enviado polo anterior goberno provincial para avaliación, en marzo e en setembro de 2022, concluía que a documentación remitida adoecía dunha "falta de rigor", con erros e emisións, polo que non foi avaliado.
Agora a Deputación de Pontevedra espera que Patrimonio autorice esta rehabilitación "canto antes" para "inmediatamente" pedir licenza municipal e contratar as obras.
RESPOSTA DE MOSQUERA
O portavoz do BNG na Deputación de Pontevedra, César Mosquera, lamentou que o vicepresidente "non anunciou absolutamente ningún paso adiante, ningunha xestión nova, ningún avance", con respecto aos edificios centrais do Museo ou o concento de Santa Clara.
"A realidade é que nestes momentos está peor que hai dous anos", recalcou, xa que estes proxectos "están máis atrasados", reiterou.
De novo Mosquera dirixiuse ao presidente da Deputación de Pontevedra, Luís López, para, atendendo á súa experiencia como anterior xestor do Museo, ofrecerlle a súa colaboración para sacar adiante este proxecto no que "o señor Domínguez xa demostrou a súa incapacidade" recomendando "que se dedique a outras cousas".
Mosquera subliñou que o proxecto aprobado polo goberno bipartito en maio de 2023 si estaba sendo controlado polo departamento provincial de Arquitectura. Subliña que así consta oficialmente na acta do
Pleno na que se aprobou o proxecto, citando que existe informe de supervisión da xefa de servizo, co seu correspondente código de verificación.
Mosquera tamén subliña que o proxecto aprobado no Pleno en maio de 2023 estaba a piques de ser enviado ao departamento de Contratación para iniciar a licitación. Lembra que o propio Partido Popular solicitou publicamente que se paralizase ese trámite ao "non entender" a urxencia de facelo xusto antes das eleccións municipais que podían dar lugar a un cambio no goberno provincial, condicionando os seguintes movementos dos futuros mandatarios. Finalmente, por principio de prudencia, o bipartito decidiu agardar para abrir esa licitación. Tras iso, o goberno provincial cambiou de mans.
En canto á autorización de Patrimonio ao proxecto aprobado en 2023, o voceiro do Bloque subliñou que "estaba todo negociado e recollidas todas as aportacións de Patrimonio, todas".