O presidente da Deputación de Pontevedra, Luís López, e o alcalde de Vilanova de Arousa, Gonzalo Durán, asinaron este luns un convenio de colaboración no Pazo Provincial, co obxectivo construír un centro de talasoterapia no Terrón.
O acordo enmárcase dentro do Plan Extra, un programa destinado a financiar proxectos estratéxicos en municipios con menos de 50.000 habitantes, e que mobiliza até 38 millóns de euros na provincia.
Con este convenio, a administración provincial destinará unha partida de 900.000 euros para apoiar a execución deste ambicioso proxecto.
Segundo Luís López, este investimento non só contribuirá á mellora das instalacións locais, senón que tamén servirá para "desestacionalizar e fomentar un turismo de calidade en toda a provincia de Pontevedra".
O proxecto contempla a construción dun edificio de tres plantas nunha zona dedicada a equipamentos deportivos, que albergará o centro de talasoterapia, xunto cunha instalación deportiva anexa.
O deseño inclúe, ademais, unha sala multiusos, zona de vestiarios e recepción, para ofrecer un servizo integral aos usuarios.
Gonzalo Durán destacou a importancia do convenio, subliñando que, despois de dúas décadas de traballo, "por fin, grazas ao apoio da Deputación, temos garantida a viabilidade deste proxecto".
O alcalde tamén lembrou que o investimento total ascende a cinco millóns de euros, e que permitirá pór en marcha un centro de talasoterapia público, o primeiro destas características na provincia, moi demandado polos veciños de Vilanova de Arousa.
Ademais, a colaboración entre a Deputación e o municipio non se limita ao Plan Extra. Este ano, o Concello de Vilanova recibirá ao redor de 1,64 millóns de euros a través doutros programas de cooperación, como o Plan +Provincia e o Plan Extraordinario de Infraestruturas Deportivas.