O mal tempo rexistrado durante a tarde do domingo provocou o derrubamento parcial dun muro na rúa Carabuxeira, consecuencia das intensas choivas, segundo apuntan desde o Concello de Sanxenxo.
A Policía Local e o servizo de Emerxencias desprazáronse ata o lugar para garantir a seguridade na zona.
A propietaria do inmoble afectado, que reside fóra de Sanxenxo, xa foi informada e asumirá a xestión da situación nas próximas horas.
Ao longo da mañá deste luns 17 tamén se detectou outra derruba na zona da Lamela (Bordóns), previsiblemente ocasionado polas precipitacións recentes, segundo indican fontes municipais.
Paralelamente, as obras na Rúa Cesteiros e Panadeira continúan a bo ritmo a pesar das adversas condicións meteorolóxicas destes días.
A colocación da baldosa hidráulica en ambos os viarios está practicamente finalizada e, se o tempo o permite, a próxima semana comezarán os traballos de pavimentación nas rúas da contorna do mercado, que inclúen ademais Panadeira, Cesteiros e Viña da Fonte.
O proxecto de mellora, valorado en máis de 300.000 euros, contempla a renovación integral da iluminación, a sinalización, a drenaxe e a adaptación dos semáforos no cruzamento da Rúa do Progreso á súa nova localización.
Tamén están previstas a instalación de varandas para mellorar a seguridade peonil, bancos, papeleiras e a creación de dúas novas zonas axardinadas.