A Policía Nacional dá por desarticulado un foco moi activo de venda de drogas polo miúdo situado nunha vivenda da zona de Corbaceiras.
É resultado dunha redada realizada o pasado 12 de marzo en colaboración coa Policía Local de Pontevedra e, á hora de facer balance, destacan que este narcopiso abastecía de sustancias estupefacientes algúns mozos de centros escolares próximos á praza de touros.
Esta operación, bautizada Crow, forma parte das colaboracións que realizan as policías Nacional e Local de Pontevedra na loita contra o tráfico de drogas a mediana e pequena escala na cidade.
Como responsable desta narcopiso foi detido un home e realizouse un rexistro no domicilio, no que se atoparon 200 gramos de haxix, 300 gramos de marihuana, varios anacos de haxix, cogollos de marihuana preparados para a venda e distribución directa e algunha dose de cocaína.
A investigación remóntase a principios deste ano 2025, cando, grazas á colaboración cidadá, tiveron coñecemento de que nun domicilio dedicábanse á venda activa e distribución de sustancias estupefacientes, fundamentalmente haxix e marihuana e ocasionalmente cocaína.
O Grupo 1 de Unidade de Droga e Crime Organizado (UDYCO) da Policía Nacional e o Grupo SAI da Policía Local realizaron distintas incautacións e vixilancias conxuntas e lograron determinar a identidade das persoas que vivían na vivenda e comprobar que alí se vendía droga.
O día do rexistro contraron coa axuda da Unidade Canina da Policía Nacional e atoparon, ademais da citada droga, diñeiro fraccionado e útiles para a preparación de estupefacientes.