Desfile de récord en Caldas, coa deliberación do xurado máis longa da historia do Entroido

Milleiros de persoas déronse cita este domingo en Caldas para ver o multitudinario desfile de Entroido, que este ano deixou algún rexistro récord. 

Así, tal e como indicou o Concello, o xurado tivo a deliberación máis longa da historia no Entroido caldense.

 O tenente de alcalde, Manuel Fariña, sinalou este domingo que o desfile de Caldas é "o mellor do norte da provincia de Pontevedra".

Este domingo houbo preto de 1.500 participantes e, segundo a información do Concello, chegaron desde moi distintos lugares. "Cada vez veñen participantes de máis lonxe", asegura Fariña.

Ademais, o tenente de alcalde destaca o "inmenso labor" dos centros educativos e ANPAS do municipio, que "sempre dan o mellor de si mesmas para facer que o Entroido de Caldas medre cada ano".

O Concello destaca a "grande calidade" dos disfraces e carrozas e as cada vez mellores animacións que se presentan.