Un día despois do levantamento do esqueleto de "Cornelia " xurde un novo achado no xacemento da Lanzada. Neste caso, o equipo de arqueoloxía da Deputación atopou esta martes o corpo dun bebé.
Segundo indica a doutora e antropóloga física, Olalla López Costas, da Universidade de Santiago de Compostela, que xa participara no estudo dos esqueletos que xurdiron nas escavacións da Lanzada nas décadas dos 60 e 70 do século pasado, trátase da primeira vez que aparecen ósos dun bebé na Lanzada, neste caso, dun neonato moi deteriorado que se atopaba encollido nunha zona de área situada 5-6 metros a carón de "Cornelia".
A doutora López asegurou que este achado casual do esqueleto do bebé non ten porqué implicar relación co da muller nova atopada onte, pero si é unha novidade desde o punto de vista antropolóxico xa que se pensa que naquela época non se enterraban os menores dun ano.
Pola súa banda, o arqueólogo da Deputación de Pontevedra, Rafael Rodríguez, considera que se trata dun esqueleto de igual época que Cornelia, é dicir, e a falta de estudos que o confirmen, do século I despois de Cristo.
Os expertos non descartan que aparezan novos esqueletos similares.