A Policía Local de Vilagarcía de Arousa tramitou dilixencias xudiciais contra dúas persoas tras unha intervención realizada durante a quenda de noite deste xoves, 2 de xullo. Unha patrulla interceptou na zona de Rubiáns un vehículo que circulaba co sistema de iluminación apagado.
Ao requirir a documentación, os axentes comprobaron que a muller que se atopaba ao volante carecía de permiso de condución, sen telo obtido nunca.
No asento do copiloto viaxaba un home que se identificou como o condutor habitual do turismo.
Este ocupante manifestou aos axentes que era coñecedor de que a condutora non tiña a habilitación correspondente e detallou que nese momento estaba a impartirlle clases de condución.
Por estes feitos, a condutora é investigada como presunta autora dun delito contra a seguridade viaria, mentres que o acompañante figura nas dilixencias en calidade de cooperador necesario.
O parte de incidencias da Policía Local das últimas horas recolle outras intervencións. Durante a xornada do mércores, os axentes abriron un expediente administrativo por alcoholemia ao condutor dun coche que circulaba a velocidade elevada pola avenida de Rosalía de Castro, procedendo á inmobilización do vehículo.
Noutra intervención, someteuse ao test de estupefacientes a un condutor que presentaba síntomas de inxerir substancias estupefacientes, rexistrando un resultado positivo en cocaína.
Finalmente, durante a quenda de tarde do mércores, as forzas de seguridade localizaron na avenida de Pontevedra un turismo que figuraba nas bases de datos policiais cunha denuncia por subtracción, logrando a súa recuperación.