Un mozo menor de idade foi detido na noite deste mércores como presunto autor do intento de agresión sexual a dúas mozas ocorrido pouco antes na zona do paseo peonil do río dos Gafos. O rapaz ten 16 anos, pero, debido á súa condición de menor, non se facilitan detalles sobre a súa identidade nin a literalidade do acontecido.
Segundo puido saber PontevedraViva, os feitos ocorreron sobre as 21.15 horas no paseo de madeira, na zona situada entre Alcalde Hevia e a parte traseira do centro de menores Avelino Montero, cando as rapazas estaban a practicar deporte.
O mozo supostamente abordounas por detrás e tentou agredilas sexualmente e elas empezaron a gritar e pedir axuda. Nun momento dado, fuxiu correndo, pero, ante os berros das mozas, un axente da Policía Nacional que estaba na zona saíu correndo tras el e deulle alcance. Xusto nese momento, chegou tamén unha patrulla policial alertada polo sucedido e o mozo foi detido.
O mozo foi trasladado á Comisaría Provincial do Corpo Nacional de Policía. Resultou ser menor de idade e foi trasladado aos calabozos da Comisaría de Marín, onde pasou a noite á espera de que este xoves continúen as investigacións sobre o ocorrido e se tome declaración ao detido, as presuntas vítimas e posibles testemuñas, entre os que habería unha terceira moza.