As cinco persoas detidas en Vilanova e Vilagarcía de Arousa, considerados polos investigadores como intermediarios na venda de drogas, eran os responsables de "un dos maiores supermercados" de menudeo na zona.
Así o desvelou este venres a Policía Nacional, que considera desarticulado este grupo criminal, que non só vendía na zona de Arousa senón que tamén distribuía a outras cidades utilizando vehículos caleteados para ocultar a droga.
Esta operación, denominada "Ninja II", é a segunda fase da que se desenvolveu con anterioridade na cidade de Pontevedra e na que se desmantelou un narcopiso que fornecía de drogas a varios puntos negros do centro desta localidade.
A investigación policial comezou a principios deste ano por mor das informacións recibidas no grupo 1 da unidade de droga e crime organizado (Udyco) que alertaban da existencia de dúas vivendas nas que se vendía e distribuía droga.
Os integrantes da organización utilizaban tamén un vehículo caleteado no que realizaban transportes de droga a Santiago de Compostela e Melide (A Coruña) e a Redondela para fornecer a persoas que se dedicaban á venda polo miúdo nestas localidades.
Durante a investigación, os axentes levaron a cabo varias incautacións de estupefacientes a terceiras persoas que acudían ao domicilio do líder do grupo criminal, acreditando máis de 50 visitas ao lugar para a adquisición da droga e o seu consumo inmediato.
O líder do grupo tiña na súa vivenda un habitáculo específico con todo o material necesario e todo tipo de obxectos destinados ao consumo directo na vivenda, ao que accedían para abastecerse ao redor de 50 persoas ao día.
Durante os dous rexistros simultáneos realizados en Vilanova e Vilagarcía, interviñéronse 300 gramos de haxix, 3 quilos de cogollos de marihuana, 35 gramos de cocaína, varias doses de cocaína, 1 quilo de corte de cocaína, diñeiro fraccionado e básculas de precisión.
Tamén foron localizados dous vehículos, un deles con sistema de ocultación tipo caleta, dúas motocicletas de gran cilindrada, cinco teléfonos móbiles, un teléfono vía satélite, material informático, catro escopetas, dúas máquinas de envasado ao baleiro e cadernos con anotacións, ademais dunha prensa hidráulica cos moldes preparados para o prensado da cocaína.
Ademais, os axentes incautaron outros obxectos de "dubidosa procedencia", entre eles 17 reloxos de alta gama e bicicletas de categoría superior que están pendentes de comprobar se son roubados, xa que algúns dos consumidores adoitan pagar as sustancias con produtos subtraídos.
Nun galpón anexo a unha das vivendas, as autoridades descubriron un espazo preparado para o cultivo a gran escala de marihuana e no que se interviñeron 40 portalámparas e outros tantos transformadores utilizados para as plantacións indoor de marihuana.