Axentes da Policía Nacional detiveron dous homes en relación cunha agresión de carácter homófobo ocorrida a principios deste mes na cidade de Pontevedra.
Segundo informaron fontes oficiais da Comisaría de Pontevedra, os feitos remóntanse á madrugada do pasado 3 de agosto, cando dous mozos que estaban a gozar dunha noite de festa foron agredidos tras saír dun local de lecer.
Ao deterse fronte a unha tenda de roupa, bicáronse, momento no que un grupo de catro persoas pasou polo lugar. Dous deles comezaron a increpar á parella con insultos ofensivos.
A situación tornouse violenta rapidamente. Un dos agresores propinou unha forte puñada a unha das vítimas, que caeu ao chan inconsciente. Acto seguido, ambos os detidos atacaron ao segundo mozo.
Grazas á rápida intervención de testemuñas, que avisaron á Policía Nacional e aos servizos sanitarios, as vítimas foron trasladadas aos hospitais QuirónSalud e Montecelo para recibir atención médica. Mentres tanto, os agresores fuxiron do lugar.
A investigación levada a cabo polos axentes da Comisaría de Pontevedra permitiu identificar e localizar aos responsables, quen xa foron postos a disposición do Xulgado de Instrución de Garda.
A praza de España acolleu o pasado 11 de agosto unha concentración en repulsa por esta agresión homófoba, nun acto de condena foi convocado polo colectivo Avante LGTB+.
Desde a Policía Nacional tamén lembran o seu firme compromiso na loita contra os delitos de odio e a súa determinación para protexer a todas as persoas, independentemente da súa orientación sexual ou identidade.