Días de festa no Icewolf para celebrar o seu décimo aniversario

Dez anos de vida ben merecen unha gran celebración. O Icewolf organizou varios días de festa para conmemorar a súa primeira década de exitosa traxectoria en Pontevedra e presentar a que será a súa nova aposta gastronómica para o seu restaurante en Vigo.

Numerosas autoridades, co alcalde de Pontevedra e membros da corporación municipal á cabeza, asistiron ao primeiro destes encontros cos que os responsables do restaurante quixeron reunir a todas as persoas "que fixeron posible esta aventura".

Foi a antesala ás dúas festas importantes, abertas ao público en xeral, coas que o Icewolf conmemorará este décimo aniversario.

A primeira delas será este venres 28 de febreiro, entre as 18:30 e as 21:30 horas, en Pontevedra.

No seu local, situado na Rúa Doa Tareixa, haberá unha sesión de 'tardeo' con bebida, con comida -petiscos elaborados nas súas cociñas- e cun concerto que ofrecerá Rodrigo Valiente.

Ao día seguinte, o sábado 1 de marzo, producirase a gran estrea da nova carta no Icewolf Baiuca Vigo, unha oferta gastronómica que estará máis centrada na cociña tradicional e que os comensais poderán degustar no establecemento da Praza de Compostela.

Buscan así complementar esta nova carta coa proposta "máis rabuda e viaxeira" que ofrecen en Pontevedra e que seguirá sendo a súa referencia gastronómica.

No caso de Vigo, a festa de presentación deste novo concepto culinario arrancará sobre o sete da tarde e estará amenizada por Tots DJ.