O campamento Campalledo duplicará este ano a súa capacidade e alcanzará as 80 prazas para consolidarse como unha das principais propostas estivais dirixidas á mocidade de Cerdedo Cotobade.
O programa, impulsado polo Concello en colaboración coa Federación Provincial de ANPA de Pontevedra (FANPA), desenvolverase entre o 26 de xullo e o 6 de agosto e organizarase en dúas quendas semanais de 40 participantes cada un.
Durante a presentación, o alcalde, Jorge Cubela, subliñou que esta ampliación responde á boa acollida da primeira edición e á intención de reforzar a oferta de oportunidades educativas, culturais e de lecer para a infancia e a mocidade.
O campamento terá como base o colexio de Carballedo, que estará habilitado como aloxamento e desde o que se articularán todas as actividades deportivas, culturais e medioambientais.
Entre as propostas previstas atópanse saídas á contorna de San Xusto, ao parque multiaventura de Altaia, ademais de propostas de convivencia que favorezan a aprendizaxe, a autonomía persoal e a socialización.
"Queremos que os participantes leven unha experiencia positiva, pero tamén que aprendan a coñecer, respectar e valorar o patrimonio, o medio ambiente e as tradicións que conforman a identidade de Cerdedo Cotobade", engadiu Cubela.
Engade Pontevedra Viva como fonte preferida de Google de balde
Mantente informado coas últimas noticias de actualidade.