O colectivo Capitán Gosende vén de descubrir un novo gravado rupestre que non estaba documentado en Cerdedo-Cotobade. Foi, concretamente, no núcleo de Cavadosa.
O achado foi durante os labores que estaban a realizar para estudar o deficiente estado de conservación da ponte medieval do lugar.
O petróglifo componse dun agrupamento de cinco coviñas de 5, 7, 9, 10 e 15 centímetros de diámetro e boa fondura. As coviñas foron talladas na parte superior dun cachote de granito que integra os alicerces dunha casa.
Esta construción sitúase á saída do lugar, en dirección ao veciño lugar de Abelaíndo.
O soporte, segundo esta asociación, é un fragmento de laxe, extraído dun afloramento máis grande que está situado nas inmediacións.
A pedra dormente é pasante, polo que foi imposible a súa inspección pola parte interior do inmoble, xa que o espazo está cuberto dunha grosa capa de estrume.
O novo achado denominouse petróglifo da Cavadosa e fai o número 59 dos petróglifos inventariados no antigo municipio de Cerdedo.
Engade Pontevedra Viva como fonte preferida de Google de balde
Mantente informado coas últimas noticias de actualidade.