O portavoz municipal do Partido Popular, Rafa Domínguez, cargou este mércores contra o goberno local de Pontevedra polo que considera unha nova perda de financiamento europeo.
En rolda de prensa, Domínguez advertiu que o Concello está en risco de perder 2,2 millóns de euros de fondos Next Generation destinados ao destape do río Gafos ao seu paso polo tramo urbano, unha obra que cualifica de "moi importante para os pontevedreses".
"O destape do Gafos é un proxecto do que levamos máis de cinco anos falando, pero segue sen avances reais. É unha mágoa", lamentou Domínguez, sinalando directamente ao alcalde Miguel Anxo Fernández Lores como "único responsable" desta situación.
Segundo explicou, os fondos europeos estaban condicionados a que as obras finalizasen antes do 31 de decembro de 2025, algo que agora ve "materialmente imposible" pola lentitude na tramitación.
Domínguez tamén lembrou que recentemente xa denunciou a perda dun millón de euros para os salóns do Lérez e que esta mesma semana, na Deputación, acusou ao anterior vicepresidente provincial, o nacionalista César Mosquera, de "facer perder tres millóns de euros por non tramitar unha licenza municipal".
"Co Gafos son 2,2 millóns máis. En total, 6,2 millóns perdidos pola falta de xestión do BNG", asegurou.
O portavoz popular insistiu en que o PP "está a favor do proxecto" e que a súa valoración foi positiva desde o primeiro momento, aínda que expresou preocupación polo atraso e a posible afectación aos veciños: "Hai inquedanza pola aparición de insectos e roedores se non se fai ben".
Domínguez tamén sinalou que a Xunta, a través de Augas de Galicia, xa deu a súa autorización, polo que descarta culpas a outras administracións: "Que estivo a facer Lores todo este tempo? Lores e Mosquera están afeitos a liala", criticou, en referencia tanto ao alcalde como a Mosquera.
Finalmente, o líder do PP local suxeriu que a Deputación podería aínda participar no proxecto, ao contar con 2,5 millóns de euros dispoñibles, e lamentou que "con eses 6,2 millóns que se perderon, poderiamos ter avanzado o pavillón da Parda, aparcadoiros en Montecelo ou moitas outras melloras necesarias".
"A obra do Gafos pode ter valor ambiental e urbano, pero a xestión foi nefasta", sentenciou.