A empresa EC Casas será a encargada de executar as obras para renovar o saneamento e pluviais na Caeira.
O proxecto permitirá dar unha nova vida a unha rede que, na actualidade, está ao final da súa vida útil, provocando avarías e roturas e ocasionando problemas de inundación nas pistas de tenis e mesmo en vivendas.
Parte da rede transcorre a través das pistas de tenis e os colectores están situados en parcelas privadas nas que, con posterioridade, se foron construíndo edificios. Por iso é polo que non é posible ter acceso para realizar ningunha actuación.
O contrato adxudicouse por un importe de 72.026,00 euros e o prazo de execución das obras é de dous meses.
A actuación será financiada pola entidade Zoe Home, que está construíndo na actualidade 27 vivendas unifamiliares pareadas e adosadas nas rúas Illa de Ons e Illa de San Simón, en Boa Vista.
Dentro desta promoción, tiña proxectado executar a conexión á rede de pluviais e saneamento mediante pozos de bombeo ata a rede existente na rúa Illa de Tambo.
O Concello de Poio, Zoe Home e Inmobiliaria Club de Tenis asinaron un convenio para executar as obras para mellorar o trazado e as redes de pluviais e saneamento.
A través deste convenio entre tres partes, aproveitarán os pozos de bombeo que xa tiña proxectados Zoe Home para anular os colectores actuais e, de paso, modificar tamén o trazado das redes de pluviais e saneamento para que transcorran polos viais públicos e non a través das vivendas.
A mellora ofrecerá unha solución non só para as novas vivendas en construción, senón que ademais dará resposta a unha problemática existente en toda esta zona.
HUMANIZACIÓIN DA BARCA
O Concello de Poio tamén ten en marcha o proceso para licitar as obras de humanización da PO-308 entre A Barca e o Casal de Ferreirós.
Segundo a información facilitada polo Concello de Poio, oito empresas presentaron as súas propostas.
Esta é a primeira fase da humanización, que ten un orzamento de licitación de 1,7 millóns de euros.
A actuación execútase a través dun convenio asinado entre o Concello de Poio e a Xunta de Galicia para transformar unha das entradas ao municipio.
As obras comezarán a executarse a partir do paso de La Vuelta por Poio, no mes de setembro, e prolongaranse aproximadamente durante un ano.