Poio aumentará moi pronto a súa oferta de aloxamentos turísticos. Será con dous novos apartahoteis que se construirán en Covelo.
O proxecto, que xa conta coa autorización de Turismo de Galicia, foi aprobado tamén na comisión municipal de urbanismo.
Os novos apartahoteis ofertarán, no seu conxunto, case cincuenta novas prazas.
Terán a categoría de tres estrelas e ocuparán parcelas contiguas. Contarán con oito apartamentos cada un deles.
Para a concelleira de urbanismo, Rocío Cochón, a chegada destes dous novos establecementos hoteleiros demostra que Poio está "en pleno crecemento".
Así, recordou que nos últimos meses estanse dando a coñecer numerosas iniciativas turísticas, pero tamén residenciais e empresariais en todo o municipio.
A edil quixo agradecer a todos os que están confiando no potencial de Poio e escollen este municipio para os seus proxectos, e garantiu que "terán sempre a porta aberta e toda a colaboración do goberno local para xerar riqueza e emprego".
O obxectivo de todo este traballo, segundo Cochón, é seguir facendo de Poio "o mellor lugar para vivir, traballar, investir e visitar os 365 días do ano".