A Sección Cuarta da Audiencia Provincial de Pontevedra sinalou para a próxima semana dous xuízos por agresión sexual a menores de idade.
Un dos casos procede do partido xudicial de Vilagarcía. A Fiscalía pide cinco anos e un día de prisión para un home acusado dun delito continuado de abuso sexual a menor de 16 anos.
Segundo o escrito de acusación do Ministerio Público, este individuo realizou tocamentos en varias ocasións a unha nena coa que convivía e coa que mantiña unha relación de familiaridade.
O segundo xuízo procede do partido xudicial de Ponteareas e sentará no banco a outro home para o que a Fiscalía solicita unha condena de 14 anos de prisión por agresión sexual con acceso carnal a menor de idade.