A dragaxe do Río Lérez en Pontevedra está, nestes momentos, pendente de dous informes que deben emitir distintos organismos do goberno central que estarán listo, si todo vai segundo o previsto, durante este verán. Unha vez emitidos, todo quedará en mans da Xunta de Galicia.
Así o indicou este martes o subdelegado do Goberno en Pontevedra, Abel Losada, tras reunirse con Eduardo Dobarro e Ana Pavón, novos presidente e secretaria do Club Naval.
Losada explicou que a nova directiva mostrou a súa "preocupación" pola situación actual do dragado, que "efectivamente, limítaos, en certa medida, a súa capacidade operativa".
Trasladoulles o estado actual deste proceso na parte que é competencia do goberno central, separando o que é responsabilidade da administración á que representa e o que compete á Xunta.
Así, lembrou que o Centro de Estudos e Experimentación de Obras Públicas (CEDEX), organismo técnico dependente do Ministerio de Transportes, emitiu un informe que sinala tres posibles puntos de vertedura en toda a zona costeira.
Emitido ese informe, o expediente está pendente da emisión dun informe de biodiversidade que corresponde ao Ministerio de Medio Ambiente e dun informe de compatibilidade de Medio Ambiente e de Costas.
Ambos os documentos, xunto co xa emitido polo CEDEX, trasladaranse á Xunta, que, tal e como lembra Losada, "é quen ten que facer en termos operativos este dragado".
Aínda que se recoñece "remiso a dar prazos", Losada indicou que esta parte que corresponde ao goberno central "debería estar ao longo do verán".
Lembrou o subdelegado que o dragado do Lérez estivo "na nevedra durante moitos anos, 15 anos", durante os que na Xunta de Galicia "estiveron de brazos cruzados".
O actual presidente autonómico, Alfonso Rueda, segundo Abel Losada, "dinamizou" a actuación, que é "imprescindible en Pontevedra, en termos náuticos, medioambientais, turísticos".
Con todo, repróchalle que os actuais orzamentos autonómicos tan só teñen consignados 100.000 euros, a pesar de que a Xunta anunciou que serían tres millóns. "Está moi ben como discurso, pero os documentos oficiais din outra cousa", recriminou.