Xa está todo preparado para a entrega dos Premios Egeria 2025, cos que a Universidade de Vigo distingue cada ano os mellores Traballos Fin de Grao, Fin de Mestrado e teses de doutoramento que incorporan a perspectiva de xénero na súa investigación.
A cita terá lugar o vindeiro mércores, coincidindo coa celebración de San Tomé de Aquino, patrón da Universidade, nun acto no que se darán cita os seis estudantes premiados nesta edición, dúas delas do campus de Pontevedra.
Na categoría de teses de doutoramento, dotada cun premio de 1.000 euros, o recoñecemento con maior puntuación foi para Clara Sánchez Vázquez, pola súa investigación sobre a representación e o papel das mulleres nos xornais La Voz de Galicia e Faro de Vigo entre 2010 e 2020.
A tese, defendida o pasado setembro na Facultade de Comunicación, analiza desde unha perspectiva de xénero máis de 3.000 pezas informativas e preto de 5.000 suxeitos informativos.
O estudo conclúe que as mulleres seguen estando infrarrepresentadas como protagonistas das noticias e persiste unha forte segregación tanto vertical como horizontal no exercicio profesional dentro dos medios.
"A estrutura mediática galega mantén un marcado androcentrismo, reproducindo estereotipos e desigualdades", sinala a investigadora, quen destaca o contraste entre esta realidade e os avances sociais impulsados polos movementos feministas nas últimas décadas.
Na categoría de Traballos Fin de Mestrado, cun premio de 600 euros, o galardón foi para Elisa e Marcela, un proxecto da deseñadora e ilustradora Sara Nieto Fernández, egresada do Máster en Dirección de Arte e Publicidade. Trátase dun álbum ilustrado infantil comprometido coa diversidade, a igualdade e a educación en valores desde as primeiras idades.
A obra recupera a historia real de Elisa e Marcela, protagonistas do primeiro matrimonio entre dúas mulleres en Galicia no ano 1901, nun contexto social fondamente conservador.
A través dunha narrativa coidada e adaptada ao público infantil, o proxecto busca visibilizar a diversidade afectivo-sexual, rescatar referentes históricos silenciados e promover o respecto e a inclusión desde a infancia.
"O formato de álbum ilustrado permite abordar temas complexos dun xeito accesible e emocionalmente próximo", explica a autora, que marca como obxectivos divulgar a historia con rigor, crear unha narrativa pensada para a infancia e fomentar a educación en diversidade sexual como ferramenta para a igualdade.
"Este premio é para min un orgullo. Dar visibilidade a temas moitas veces silenciados sempre é necesario", asegura Nieto, quen confía en achegar con este traballo o seu “gran de area” para construír unha sociedade máis xusta e diversa desde a base educativa.