Tras o éxito do pasado ano, no que lograron case 30.000 viaxeiros, o bus urbano volverá este verán a percorrer Sanxenxo a través das súas dúas liñas circulares.
Será a partir do 1 de xullo e até o 31 de agosto, segundo informou o goberno municipal.
O Concello de Sanxenxo pono en marcha a través dun convenio coa Xunta como un servizo de interese municipal, para que así os usuarios poidan acollerse aos seus descontos.
As tarifas serán as mesmas que aplica a Xunta, é dicir, 1,55 euros por billete ordinario, 0,70 euros por pago co cartón da mobilidade de Galicia.
Os menores de 21 anos e os maiores de 65 poderán viaxar gratis.
O acordo establece a implantación de dúas liñas circulares, con dous autobuses, coa igrexa de Sanxenxo como punto de inicio e fin, que percorren de forma lineal todo o municipio nun tempo estimado de 50 minutos.
Unha transcorrerá por Vilalonga e a outra pola Lanzada, con saída e chegada á igrexa de Sanxenxo.
Un bus partirá desde as 8:30 horas, cada hora, até as doce e media da noite, desde Sanxenxo para percorrer Vilalonga, A Lanzada e volta a Sanxenxo.
O outro partirá desde Sanxenxo para continuar por Portonovo, A Lanzada e volta a Sanxenxo desde as 8:00 horas, cada hora, até as doce da noite.
A frecuencia será de até 32 viaxes por cada liña, de luns a domingo.
O servizo proponse como un servizo tamén para propietarios e traballadores de hostalaría, así como para veciños e visitantes.
O Concello repite, por segundo ano, esta modalidade de servizo de bus urbano e suprime a lanzadeira despois de que o ano pasado non obtivese os resultados esperados.
As dúas liñas circulares foron utilizadas durante o ano pasado por 29.528 viaxeiros, dos que un total de 15.523 subiron aos autobuses en agosto.