Dúas persoas foron trasladadas ao hospital tras un incendio na súa vivenda na madrugada deste venres, no lugar de Couto Arriba, en Castrelo (Santa Cruz), Cambados.
Segundo informaron os servizos de emerxencia, ambas sufriron intoxicación por inhalación de fume, e unha delas presentou tamén queimaduras nas mans ao intentar apagar o lume.
O incendio produciuse pouco despois da unha e media da madrugada, cando un particular alertou ao 112 Galicia sobre o lume na súa casa, sinalando que non había persoas no interior.
Tras recibir o aviso, o 112 mobilizou aos Bombeiros de Ribadumia, ao GES de Sanxenxo, á Garda Civil, á Policía Local e aos efectivos do Servizo Municipal e da Agrupación de Voluntarios de Protección Civil.
Ao chegar ao lugar, os axentes solicitaron asistencia sanitaria para unha muller que presentaba unha crise de ansiedade, o que derivou na intervención do Servizo de Urxencias Sanitarias de Galicia-061.
Os Bombeiros confirmaron que a totalidade do incendio foi extinguida e que ardeu completamente unha habitación, mentres que o resto da vivenda sufriu danos principalmente polo fume.