Este luns tratábase na Xunta de Goberno Local do Concello de Pontevedra os cambios solicitados en relación coa demolición do edificio número 3 da rúa Gutiérrez Mellado.
En primeiro lugar, cambiou a titularidade na concesión da licenza ao pasar do solicitante inicial, Hercor Inveresiones SL, a Cubreiro SL.
Pero, ademais, solicítase tamén unha modificación importante dentro do proxecto de execución previsto na demolición do inmoble. Se inicialmente estaba prevista durante as obras de demolición e construción deixar unha servidume de paso para dar servizo ás Galerías da Oliva, agora a empresa elimina este dereito de paso, segundo informaba Anabel Gulías, portavoz do goberno local.
A partir da concesión desta modificación, a empresa solicitante dispón de doce meses para a derriba cun orzamento de 96.906 euros.
Ao tratarse, segundo explicou, dunha licenza que se desenvolve nun espazo privado, o Concello concede a licenza e poñerá en coñecemento das persoas interesadas o cambio no proxecto de execución. A partir de aí, aquelas persoas que se consideren prexudicadas pola decisión deberán realizar unha reclamación a través do Xulgado do Civil.
"Todo parece indicar que no futuro quedarán sen dereito de paso", avanzou a portavoz municipal, en referencia ao futuro das Galerías a través de Gutiérrez Mellado. En todo caso, lembrou que a empresa deberá realizar aínda a tramitación correspondente para obter a licenza para a construción do edificio.