EC Casas, unha das seis empresas que optaban a executar a reforma integral da rúa Rosalía de Castro e a construción do novo baipás cara á ría, encargarase de materializar a ansiada transformación do barrio de Mollavao.
A súa, unha oferta de 3.163.528 euros, foi a elixida pola mesa de contratación. Supón unha redución do 15% no prezo de licitación, fixado en 3.726.000 euros.
O alcalde de Pontevedra, Miguel Anxo Fernández Lores, indicou que as obras poderán comezar nuns dous meses, en torno ao mes de maio, unha vez se completen os trámites administrativos para formalizar o contrato.
"Avanzamos nunha obra que é fundamental e necesaria", sinalou Fernández Lores, que celebrou que por fin quede atrás unha tramitación "longa e complexa".
O prazo de execución de todo este proxecto está fixado en doce meses.
Con respecto á actuación principal, a reforma integral de Rosalía de Castro, entre María Victoria Moreno e a ponte do tren, as beirarrúas pasarán a ter até tres metros de ancho. Terá sentido único cara a Marín e pasos de peóns elevados.
Esta intervención permitirá crear zonas de coexistencia xunto á Praza de Mollavao e ao colexio Juan Sebastián Elcano. Ademais, reordenaranse as prazas de aparcadoiro, que pasarán a estar só dun lado da rúa, e renovaranse todos os servizos soterrados.
A instalación de novo mobiliario urbano, a renovación da iluminación pública ou o acondicionamento de zonas verdes en todo o trazado completarán a obra.
A todo iso sumarase a reforma de Simón Bolívar, a rúa que dá acceso á Casa do Mar, que terá uns estándar similares á reurbanización de Rosalía de Castro.
Pola súa banda, o novo baipás cara á ría, un viario que terá 97 metros de lonxitude, contribuirá a rehabilitar unha zona degradada e na que se desenvolverá unha actuación que permita mellorala ambientalmente.
O trazado desta estrada incluirá carrís de 3,5 metros, dúas rotondas nos extremos, pasos de peóns elevados e beirarrúas de tres metros a cada lado para favorecer o tránsito peonil. A velocidade estará limitada a 30 quilómetros por hora e os ciclistas compartirán calzada cos coches.