Do outro lado da ría, en Poio, pero cunha estudada posta en escena: coa fábrica de Ence detrás. Así presentou este luns En Marea o programa en materia de medio ambiente co que se presentan ás eleccións galegas do 25-S.
E é que o seu candidato, Luís Villares, teno claro. A empresa pasteira é un claro exemplo da "política tóxica" que o PP impulsou desde a Xunta nos últimos oito anos.
Alberto Núñez Feijóo, segundo o candidato de En Marea, foi a "peor bacteria" que sufriu o medio ambiente galego nos últimos anos e a prórroga concedida polo Goberno a esta "gran empresa contaminadora" coa "complicidade" da Xunta demostra que é nesta compañía onde o presidente galego ten as súas "portas xiratorias".
"Non é candidato á presidente senón candidato á conselleiro dunha das multinacionais que hoxe están estragando o medio ambiente no noso país", denunciou Villares, para quen a política ambiental do PP "está pensada unicamente para favorecer os seus amigos".
Luís Villares, que estivo acompañado entre outros de Carmen Santos -número 1 por Pontevedra- ou os edís de Marea Pontevedra, avanzou que En Marea aposta por "compatibilizar" economía e ecoloxía, xa que o seu partido entende que o "valor verde" non debe estar rifado coa industria, coa produción ou cun "futuro sostible" para Galicia.
Entre outras cuestións, Villares adiantou que En Marea defenderá o saneamento integral das rías galegas para crear "ata cinco veces máis postos de traballo", a ampliación da Rede Natura, unha maior aposta polo aforro enerxético na política ambiental da Xunta ou que Sogama deixe de ser unha "simple incineradora" de residuos.
Engade Pontevedra Viva como fonte preferida de Google de balde
Mantente informado coas últimas noticias de actualidade.