Unha planta de biomasa cunha potencia de 40 megawatts. É a nova construción que Ence expón para o seu complexo industrial de Lourizán. Así figura na modificación do plan sectorial de incidencia supramunicipal que comezou a tramitar ante a Xunta de Galicia.
Trátase dun proxecto, segundo explica a compañía, no que se investirán 120 millóns de euros e que permitirá crear uns 80 postos de traballo en Pontevedra. A eles suman outros 200 empregos indirectos asociados á mellora ambiental das instalacións.
O plan de obras que presentou Ence inclúe, ademais da nova planta de biomasa, a creación dunha instalación de secado térmico de cortizas, coa que buscan aumentar a eficiencia do combustible vexetal; e a instalación de gas natural para os seus fornos.
A previsión da compañía pasteira é construír esta nova planta nas inmediacións dos almacéns de madeira e acha, de forma que se poida aproveitar a súa proximidade ao porto de Marín e á rede ferroviaria para a chegada da biomasa.
Ence destaca que todas estas actuacións nas súas instalacións de Lourizán constituirán unha mellora importante desde o punto de vista de eficiencia enerxética e da calidade ambiental, pola importante redución nas emisións que leva.
A compañía que preside Juan Luís Arregui dáse un prazo de tres anos para iniciar as obras unha vez aprobada a modificación do plan sectorial.
Ence apela ao "interese xeral" do proxecto, entre outras cuestións, por contribuír ao desenvolvemento social e económico de Galicia, á "dispoñibilidade" de eucalipto na comunidade tras un crecemento "imparable" ou ás melloras ambientais que implicará a súa posta en marcha das novas instalacións.
O proxecto de modificación do plan sectorial presentouse ante a Xunta o pasado 28 de marzo. Actualmente, está a tramitarse a súa avaliación ambiental e requiríronse informes doutras administracións, entre elas a Dirección Xeral de Costas e o Concello de Pontevedra.
Desde o consistorio pontevedrés advertiron, con todo, que a petición de Ence está "viciada de orixe", polo que o informe municipal será, previsiblemente, negativo.
A tenente de alcalde, Carme da Silva, indicou que o proxecto supramunicipal de Ence, no seu día, foi para a construción dunha planta de papel tisú que, posteriormente, foi descartada. Por iso, o goberno municipal entende que o motivo que xustificaba esa declaración "desapareceu", polo que "non cabe" a súa modificación, senón a súa anulación.
Este argumento "abre unha vía nova" que desde o Concello "imos a explorar", usando todos os instrumentos legais ao seu alcance para frear os plans da empresa.
A petición de Ence, segundo Da Silva, é un "paso máis" na "estratexia pactada" entre a compañía e o Partido Popular para "violentar" a vontade da maioría dos cidadáns de Pontevedra "que non queren que Ence siga aí".