O Entroido invade Pontevedra, con catro horas e media de desfile e dobre premio para os Feroz

Durante catro horas e media deste sábado, Pontevedra encheuse de cor e de diversión co tradicional desfile de Entroido, que resultou multitudinario, cunha participación "masiva" e moi superior á de anos anteriores, segundo fontes municipais. 

Como xa é habitual, saía de Xosé Malvar ás 17.00 horas e os últimos participantes remataron na rúa Echegaray arredor das nove e media da noite, isto é, catro horas e media despois. As últimas comparsas, grupos e participantes individuais ou en parella saíron do punto de partida case tres horas e media despois do inicio da cita. Todos estes números confirman, como comentou a organización, un "éxito de participación, superior a anos anteriores".

A calidade dos participantes foi moi alta e finalmente o xurado acordou conceder o premio único extraordinario para grupos e comparsas Ravachol 2025 a un grupo que tocou un tema moi de actualidade no último ano en Pontevedra, a entrega dos premios Feroz. O grupo foi 'Ofrenda San Feroz'. Este mesmo grupo tamén levou o primeiro premio na categoría de grupo facha. 

Os Feroz foron un tema moi recorrente durante o desfile deste ano e tamén nos premios. De feito, na categoría de grupo facha, ademais do primeiro premio, dotado con 2.400 euros, para 'Ofrenda San Feroz', o segundo galardón, que recibe 1.700 euros, foi para 'Máis Feroz ca nunca'.

Na categoría de grupo facha, o resto dos premiados foron: 'Grolo' (terceiro, 1.200 euros), 'Os pintamonas' (cuarto, 900 euros), 'Circo: Loca Mesa de Negociación' (quinto, 500 euros) e 'Leiteiras, foron tempos' (sexto, 300 euros).

Na categoría de comparsas, unha das máis competitivas cada ano, o primeiro premio foi este 2025 para un clásico xa do Entroido, 'Os Sofamidas', que conseguiron o reocñecemento de maior importe, 2.200 euros. 

Os seguintes premios foron para 'Os 100Tolos' (segundo premio, recoñecido con 1.700 euros), 'Os Retrincos' (terceiro, 1.500 euros), 'As Sonecas' (cuarto, 1.100 euros), 'Las Flores del Carnaval' (quinto, 800 euros), 'Os da Caña' (sexto, 540 euros), 'Os Miudos' (sétimo, 300 euros) e 'Os Paparrulos' (sexto, 200 euros).

Na categoría de grupo disfrace, o primeiro premio foi para 'Os aromas do Entroido', que gañaron 2.400 euros; e o segundo, para 'Cabaret Show' (1.700). 

O resto dos premiados foron: 'Entre arlequíns e paiasos', (terceiro, 1.200 euros), 'Los Bridgertons' (cuarto, 900 euros), 'En un lugar de la Mancha' (quinto, 500 euros) e 'A pandilla pirata' (sexto, 300 euros).

Na categoría de parella facha, o primeiro premio foi para 'Nazí Presidente' (350 euros) e o segundo para 'Superligoteo' (230 euros). 

Na categoría de parella disfrace, o primeiro premio foi para 'Me gusta la fruta' (350 euros) e o segundo para 'Los más cafeteros' (230 euros).

Na categoría de individual facha, o primeiro premio foi para 'Papá Noel de Vacaciones' (250 euros) e o segundo para 'A operaria do rural' (150 euros). 

Na categoría de individual disfrace, o primeiro premio foi para 'A volta ao mundo' (250 euros) e o segundo para 'O embaixador das 4R' (150 euros).