A Escola Oficial de Idiomas (EOI) de Pontevedra e o Concello establecerán unha colaboración máis estreita para visibilizar o ensino de idiomas e integralo na vida social da cidade, segundo anunciaron este venres en rolda de prensa o alcalde Miguel Anxo Fernández Lores e as responsables do centro educativo.
María Fernández, directora da EOI, explicou que esta iniciativa supón "un paso máis para establecer colaboracións entre a EOI e o Concello, con propostas para que a EOI entre na vida social", destacando que "Pontevedra é unha cidade aberta, e os idiomas enriquecen esta conexión".
Paula Gómez, xefa de estudos da EOI, sinalou a vontade do centro de "ser nós as que saiamos á vila para que nos coñezan e non esteamos nós nos muros da Escola", buscando un maior achegamento á cidadanía pontevedresa.
O alcalde Miguel Anxo Fernández Lores destacou a importancia de que "a xente de Pontevedra poida aprender ou mellorar idiomas", recordando colaboracións previas como a realizada en 2019 durante o Campionato Multisport, cando a EOI ofreceu traducións a diferentes idiomas e cursos para taxistas.
Actualmente, a EOI de Pontevedra conta con 2.000 estudantes, unha cifra que "fluctúa de ano en ano", segundo indicou a directora.
Ademais da instalación principal na Xunqueira, o centro dispón de tres extensións: unha en Lalín, outra na Estrada e outra no IES Valle Inclán de Pontevedra.
A escola imparte seis linguas (alemán, francés, galego, inglés, italiano e portugués) a través de distintas modalidades: presencial, semipresencial e a distancia en liña.
Entre as colaboracións xa establecidas, María Fernández destacou a participación no Salón do Libro Infantil e Xuvenil cun posto na actividade de Troca de Libros.
Agora están a estudar "a opción de colaborar en Noites Abertas, integrando algún obradoiro que poidamos ofertar como escola".
As concellerías de Educación e Cultura manterán relación coa EOI para buscar actividades que desenvolver ao longo do curso.