Miguel Anxo Fernández Lores, alcalde de Pontevedra, mantivo contacto co Servizo Galego de Saúde en dúas ocasións nos últimos días para reclamar a apertura inmediata do consultorio médico de Ponte Sampaio. Sinala que, nestes momentos, a actividade sanitaria dese núcleo de poboación non se atopa atendida causándolle importantes prexuízos.
O Concello de Pontevedra explica que co inicio do estado de alarma decretado polo Goberno central, o Sergas decidía retirar ao facultativo do consultorio que dá servizo a esta parroquia e mantiña só a atención a través dun enfermeiro.
Este luns 11 retirábase tamén a este profesional de enfermería que se encargaba de facer probas entre a poboación desta zona. Esta situación xerou preocupación na parroquia e, segundo o goberno local, numerosos habitantes trasladaron o seu malestar ao Concello ante esta decisión.
Agora, a poboación da parroquia vese obrigada a trasladarse a Pontevedra para acudir ao servizo de atención primaria nun momento no que, segundo expoñen desde a alcaldía, débese respectar ao máximo as medidas de confinamento domiciliario e evitar traslados deste tipo.
Ademais, desde o goberno local de Pontevedra alertan de que a gran parte dos pacientes do consultorio son persoas de idade avanzada, con casos onde se superan os 90 anos, e que están considerados de alto risco ante a posibilidade dun contaxio da COVID-19.