Un contedor quedou totalmente calcinado tras un incendio que se rexistrou este domingo na rúa Benito Corbal, unha das máis céntricas de Pontevedra.
O suceso produciuse sobre as dez e media da noite.
A rápida intervención de varios cidadáns, que ao ver como empezaba a arder o contedor optaron por retirar o resto, axudou a que o lume non se propagase.
Foron eles ademais os que deron o aviso aos servizos de emerxencia.
Até a zona desprazáronse varias unidades dos bombeiros de Pontevedra, que se encargaron de extinguir o incendio e arrefriar a zona.
O incendio chegou a provocar mesmo pequenas explosións, previsiblemente ao rebentar parte dos residuos que había dentro do contedor.
Ademais, a rúa tivo que ser cortada temporalmente pola Policía Local para impedir o acceso de coches á zona por motivos de seguridade.
Axentes da Policía Nacional tamén responderon a esta situación de emerxencia.