Un espectáculo pirotécnico a media noite volveu servir de traca final para as Festas da Peregrina. Como xa vén sendo habitual, a cita congregou no ámbito do peirao de Corvaceiras, o ámbito de San Roque e a Alameda e as rúas de orillamar a centos de persoas, que, nesta ocasión, puideron gozar da combinación de luces, formas e cores, con toda a súa intensidade debido ao ceo despexado deste domingo.
Con motivo da tirada de lumes, a Policía Local de Pontevedra deseñara un operativo especial de seguridade que permitiu o traballo dos pirotécnicos sen a intromisión de persoas e vehículos pola zona dende a que se lanzaron e que o público gozase do espectáculo con tranquilidade. A partir das 23.30 horas quedou pechado ao tráfico rodado o perímetro do peirao de Corvaceiras e axentes situados en distintas rúas impediron que os coches se achegasen ás inmediacións.
Tras 15 minutos de espectáculo, para o que moito pontevedreses e visitantes mesmo compraron pipas para sentarse a gozar, chega xa o final das festas. Quedaban as últimas rabexadas do concerto de El consorcio, da verbena de Monteiro Ríos e das atraccións de feira instaladas no ámbito da Alameda, pero este luns Pontevedra xa amenceu coas celebracións finalizadas e unha tranquila volta á normalidade.
As Festas de Verán, que este ano implican máis de 200 actividades, aínda continúan, coa Feira Franca como cita principal do que resta de verán o primeiro fin de semana de setembro.