O Concello de Vilaboa xa puxo en marcha a conta atrás para unha das citas máis agardadas da primavera coa publicación das bases do Concurso dos Maios 2026.
Trátase dun certame aberto á participación de nenos e persoas de calquera idade, mantendo así o carácter inclusivo dunha tradición moi arraigada. Mesmo se contempla a posibilidade de que o xurado valore a incorporación doutros participantes fóra destas categorías.
As normas fan fincapé no respecto como principio básico xa que non se permitirá ningún tipo de discriminación por razón de raza, relixión ou sexo, e calquera comportamento irrespectuoso, xa sexa verbal ou físico, poderá supoñer a expulsión inmediata do concurso.
O tribunal encargado de escoller os mellores maios estará formado polo concelleiro de Cultura, unha persoa representante da asociación de veciños de Figueirido e persoal técnico municipal. A súa composición poderá variar se xorde algunha ausencia de última hora.
Á hora de avaliar as propostas, o xurado terá en conta tres aspectos fundamentais. Por unha banda, premiarase a mellor letra, valorando tanto a calidade literaria como ese ton crítico e retranqueiro tan propio da tradición galega.
Por outra, analizarase o mellor canto, atendendo á afinación, a forza interpretativa e a harmonía do grupo.
Finalmente, escollerase o mellor 'aio, onde se terá especialmente en conta a coidada elaboración e decoración, sempre respectando a clásica forma cónica característica de Vilaboa.
O sistema de votación será individual en cada unha destas categorías, sumándose as puntuacións para determinar os gañadores.
En canto aos premios, establécense tres galardóns: 300 euros para o primeiro clasificado, 200 para o segundo e 100 para o terceiro. Iso si, o xurado resérvase a opción de deixar deserto o concurso se considera que o nivel das propostas non é o adecuado.
Como requisito organizativo, as persoas participantes deberán estar no lugar do evento polo menos media hora antes do seu inicio.
Ademais, a presentación dun maio supón a aceptación íntegra de todas as bases do certame.
Engade Pontevedra Viva como fonte preferida de Google de balde
Mantente informado coas últimas noticias de actualidade.