A Garda Civil investiga un mozo de 28 anos, residente en Bilbao, por estafar 12.500 euros a un veciño de Bueu ao que enganou facéndolle crer que o SMS que recibía eran do seu banco.
A vítima denunciou os feitos en xullo de 2025 despois ser estafado a través de falsos SMS que suplantaban á súa entidade bancaria.
O home recibiu no seu teléfono varias mensaxes nas que se lle urxía a contactar cun suposto axente bancario para deter unha serie de trasferencias que se estaban realizando sen o seu consentimento.
Estas mensaxes, recibidas na propia liña de comunicación co banco, foron o gancho mediante o que o autor dos feitos logrou poñerse en contacto telefónico coa vítima, guiándoo para realizar varias transaccións.
A investigación policial, tras analizar a operativa financeira, fixo posible rastrexar o diñeiro estafado, que foi transferido a través dun armazón de contas e "mulas económicas" por toda a xeografía española co obxecto de dificultar o labor policial.
O rastro chegou até a provincia de Biscaia, onde o investigado retirou o diñeiro.
A identificación do estafador foi posible grazas á colaboración dos axentes da Ertzaintza da comisaría de Sestao (Biscaia), que foron quen o localizaron, imputándolle formalmente un delito de estafa.
Esta estafa telemática, denominada "smishing" é, segundo a Garda Civil, é unha das ciberestafas máis habituais actualmente.
A técnica consiste en remitir mensaxes SMS que suplantan a identidade de bancos, autoridades ou organismos, enganando ás vítimas para que realicen trasferencias ou faciliten códigos que permitan aos ciberdelincuentes apropiarse dos seus fondos.
Contra este tipo de estafas, as autoridades recomendan non acceder nunca a enlaces sospeitosos, dirixíndose sempre á fonte oficial para comprobar a información que nos trasladan na mensaxe ou na chamada recibida.
Engade Pontevedra Viva como fonte preferida de Google de balde
Mantente informado coas últimas noticias de actualidade.