O Concello de Vilaboa emitiu este luns, 13 de abril, un aviso a través das súas redes sociais para previr á poboación ante unha serie de chamadas telefónicas fraudulentas.
O goberno local detectou que persoas alleas á administración contactan coa veciñanza facéndose pasar por persoal municipal co obxectivo de solicitar o pago de cartos pola entrega de documentación.
A fraude segue un procedemento fixo no que o interlocutor comunica a existencia de expedientes pendentes e indica que o destinatario debe pagar unha contía para a súa recepción.
Ante estes feitos, o Concello comunicou que a institución non solicita nunca ingresos económicos pola tramitación, envío ou entrega de notificacións e documentos oficiais.
As autoridades municipais recomendan interromper a comunicación de inmediato en caso de recibir unha chamada desta natureza.
O aviso inclúe unha petición de colaboración para difundir a alerta entre os residentes e evitar que se produzan perdas económicas por esta práctica.
A Garda Civil de Pontevedra informou a PontevedraViva de que, polo momento, no constan denuncias por estas chamadas fraudulentas.
Engade Pontevedra Viva como fonte preferida de Google de balde
Mantente informado coas últimas noticias de actualidade.