Ethel Vázquez, conselleira de Infraestruturas e Mobilidade, advertía este mércores da necesidade de que os Concellos afectados pola explotación da auga do Lérez regulen a situación a través dunha figura supramunicipal.
A representante da Xunta de Galicia insistiu en que o sistema de abastecemento de auga que afecta os municipios de Pontevedra, Poio, Sanxenxo, Marín, Ponte Caldelas e Bueu permanece nunha "dobre situación irregular e alegal" en relación ao sistema de explotación e da captación da auga do Lérez.
Lembrou ao Concello de Pontevedra que teñen o deber legal de coñecer a lexislación e de impulsar a regularización desta situación. En todo caso, a conselleira insistiu en que o modelo de xestión deben decidilo todos os concellos afectados.
"As situacións irregulares e alegales hai que resolvelas", engadiu lembrando que, cando se rexistran escenarios de seca ou son necesarios trámites urbanísticos "os problemas son dos demais". Ethel Vázquez explicou que na reunión convocada en 2022 á que non asistiu o Concello de Pontevedra, o resto de representantes municipais "estaban de acordo e pensaron en crear unha entidade supramunicipal" e agarda que "con ese espírito" acudan tamén á reunión prevista para o venres 28 en Pontevedra.
Expuxo os diferentes modelos que se empregan como o de Emalcsa, na Coruña; o do consorcio do Louro ou o da Mancomunidade do Salnés, que establecen unha captación regularizada e un sistema de explotación con tarifas acordadas por todos os gobernos que forman parte.
"O fácil sería esperar a que se poñan de acordo entre eles e decidan nos plenos iniciar os trámites", afirmou Vázquez. "Convocamos con ánimo construtivo" e coa idea de resolver esta situación administrativa actual.
A conselleira engadiu que a auga do Lérez non é exclusivamente de Pontevedra para advertir que o sistema de abastecemento en alta realizouse con fondos europeos a través de Aquaest e a este sistema súmase a estación de tratamento de auga potable, de bombeos e de tubaxes para abastecer á poboación. "Debe ser explotado por todos, por unha entidade supramunicipal", argumentou apoiándose na "cogobernanza" para regular a actual fórmula e explicando que "a auga é de todos".
Por último, Ethel Vázquez recoñeceu que este verán o río Lérez atópase en condicións de "normalidade" de caudal, aínda que lembrou a importancia da xestión responsable e consumo moderado da auga cando aínda quedan semanas de tempo cálido.