É só a súa sexta edición, pero parecen moitas máis. A feira de produtos gourmet Etiqueta Negra demostra a súa boa saúde cunha alta asistencia de visitantes ao Recinto Feiral de Pontevedra.
Este domingo 13 de novembro era quenda para a segunda xornada do evento, cunha interesante programación de actividades en horario continuo de 11.00 a 21.00 horas.
Ademais de coñecer os produtos gourmet e novidades presentes nas diferentes casetas, os pontevedreses que se achegaban ao Recinto Feiral puideron seguir á primeira hora un showcooking con desgustación de Beatriz Sotelo, unha das poucas mulleres de España cunha Estrela Michelín.
Pola súa banda, tamén de mañá, o Espazo Gastro acolleu unha animada sesión vermú amenizada por Señora DJ.
Xa pola tarde estaba previsto que Miguel Mosteiro, chef e propietario de Gastrolab Arousa, tomase a remuda nos fogóns para falar do berberecho de Noia, e o Espazo Etiqueta acollía un taller de cociña con conservas e outro de cociña de aproveitamento impartidos polos responsables do espazo gastronómico Indo e Vindo.
Todo eles sen esquecer as degustacións e catas, e tamén a sesión de té galego feito con camelias da Estación Fotopatolóxica do Areeiro na Tetería da Deputación.
A feira Etiqueta Negra concluirá este luns 15 de novembro cunha última xornada en horario de 11.00 a 20.00 horas.