Chegamos a unha nova entrega de "A cociña gourmet en conserva", coa calidade de sempre das Conservas Pescamar e un dos moluscos máis prezados e saborosos das Rías Galegas: os mexillóns.
Os mexillóns gourmet Pescamar son un produto natural altamente nutritivo, grazas á súa achega en ferro, fósforo, vitamina B12 e omega 3. O seu baixo contido en graxas e alta porcentaxe de proteínas, convértenos nunha perfecta alternativa ás carnes vermellas en dietas saudables e de control de peso.
Esta receita ofrécenola o FROM, o organismo do Ministerio de Agricultura e Pesca encargado de regular o mercado dos produtos do mar. A través da súa páxina web, tamén nos lembra que "todas as elaboracións de peixe enlatado son moi aconsellables desde o punto de vista nutritivo".
Para preparar unhas deliciosas Fabas con mexillóns gourmet Pescamar, necesitamos os seguintes ingredientes:
- 400 gramos de fabas
- 2 latas de mexillóns gourmet PESCAMAR
- 1 cebola
- 2 cenorias
- 1 pemento vermello
- Medio pemento verde
- Caldo de peixe
- Pemento doce
- Sal
- Aceite de oliva virxe extra
- Perexil
- Ceboliño
Preparación:
Picamos a cebola, as dúas cenorias, o pemento vermello e o medio verde. Poñemos as verduras nunha cazola con aceite a lume medio. Engadimos unha culleradiña de pemento doce.
Cando empecen a pocharse, incorporamos o caldo de peixe e as fabas. Cociñamos a lume lento.
En canto se acheguen as fabas ao seu punto de cocción, vertemos as dúas latas de mexillóns gourmet Pescamar sen a salsa. Mesturamos con coidado para non rompelos. Rectificamos de sal e deixamos repousar coa cazola tapada.
Para servir este prato, podemos facelo directamente na cazola ou ben envorcalo nunha bandexa suficientemente fonda. En ámbolos dous casos, espolvoreamos con perexil picado e uns fíos de ceboliño.
En quince días, os produtos do mar serán de novo protagonistas dunha nova receita de "A cociña gourmet en conserva" de Conservas Pescamar.
Engade Pontevedra Viva como fonte preferida de Google de balde
Mantente informado coas últimas noticias de actualidade.