O Servizo de Emerxencias do Concello de Cambados interveu durante a tarde deste xoves 26 nun accidente de tráfico ocorrido na Avenida de Vilariño, onde chocaron un turismo e unha motocicleta.
A condutora da motocicleta, identificada como A.F., tivo que ser evacuada ao Hospital do Salnés tras presentar dor cervical e lesións na clavícula e xeonllo dereitos.
No operativo participaron, ademais do Servizo de Emerxencias municipal, efectivos da Policía Local de Cambados e unha ambulancia do 061, que se encargou do traslado da ferida ao centro hospitalario.
Investíganse as causas deste impacto frontolateral entre ambos os vehículos.
Durante a mesma xornada, os servizos de emerxencia tamén acudiron á Rúa Real de Cambados para atender outro incidente protagonizado polo tren turístico que percorre a vila durante estas datas.
Neste caso, o Pavi-Tren da localidade impactou contra unha maceta e posteriormente contra a fachada dun edificio. Neste sinistro resultaron feridas leves unha muller e unha nena de seis anos de idade.