O alcalde de Pontevedra, Miguel Anxo Fernández Lores participou este martes no espazo "Besaya Futura" no centro Caligrama de Torrelavega para expoñer o modelo de cidade na conferencia "Pontevedra, un modelo integral de cidade pensada para a persoas".
"Besaya Futura" é un espazo de análise e debate sobre as oportunidades de desenvolvemento de Torrelavega e a súa comarca, a do Besaya.
O propósito deste foro é escoitar e aprender do testemuño daqueles que aplicaron novas ideas e afrontaron con éxito retos similares aos que quere encarar a comarca do Besaya.
No encontro estiveron o alcalde de Torrelavega, Javier López Estrada, a conselleira de Presidencia do Goberno de Cantabria, Paula Fernández, e deputados autonómicos, concelleiros de Torrelavega tanto do Goberno como da oposición, altos funcionarios municipais de Torrelavega como os responsables dos servizos de Bombeiros, Movilidad, Arquitectura, alcaldes e concelleiros doutras localidades da comarca, arquitectos do Besaya, empresarios.
Segundo informou o Concello de Pontevedra a conferencia de Fernández Lores "levantou moito interese entre os invitados" que quedaron "moi satisfeitos" segundo transmitíronlles os organizadores.
As ao redor de 60 persoas convidadas e asistentes, "chamaron a atención en ter a valentía política para adoptar medidas similares na súa cidade", tal e como lle trasladou a conselleira de Presidencia do Goberno cántabro, quen non dubidou en afirmar que as cidades cántabras "deben ir cara un modelo similar ao de Pontevedra".
En xeral, a expectación pola intervención do alcalde de Pontevedra era "moi alta", tal e como lle trasladou o rexedor de Torrelavega nunha cea oficial na noite anterior.
Javier López, do partido rexionalista, destacou que estudarán o modelo de estacionamento de servizos de Pontevedra e tamén o estudo dos tráficos de paso pola cidade.
A líder da oposición no Concello de Torrelavega, Marta Fernández, do Partido Popular, tamén aplaudiu a intervención e apostou por "asumir o modelo Pontevedra no presente mandato".
A intervención Miguel Anxo Fernández Lores chamou a atención por algunha das súas reflexións como "comprar un coche non equivale a ter aparcamento gratis" ou "hai xente que se lle deixas mete o coche na cama".
"Hai xente que se lle deixas mete o coche na cama"
Lores explicou que o "modelo de Pontevedra" é unha "experiencia transversal que vai desde a mobilidade ata a xestión de residuos, a democratización dos espazos públicos, a cultura e as festas, ou a participación cidadá".
Lembrou que "cada cidade ten que buscar o seu propio camiño tendo claro que o fundamental é mellorar a calidade de vida dos veciños e veciñas".
Na conversación posterior á intervención fixéronse diversas preguntas como a acollida comercial, a queixa dos comerciantes e condutores de Torrelavega sobre a falta de estacionamentos na cidade ou como facer fronte Pontevedra ás novas fórmulas de mobilidade como os patinetes eléctricos. O alcalde convidounos a visitar Pontevedra para coñecer en persoa os logros da cidade, luva que recolleron varios dos asistentes ao foro.
Engade Pontevedra Viva como fonte preferida de Google de balde
Mantente informado coas últimas noticias de actualidade.