O Concello de Vilagarcía porá en marcha o próximo 15 de setembro unha nova edición do programa de emprego e formación Labora Xove, unha iniciativa que permitirá a 16 mozas de entre 18 e 30 anos combinar aprendizaxe e experiencia laboral durante varios meses.
Ao finalizar o itinerario, os participantes obterán un certificado profesional que facilitará a súa incorporación ao mercado de traballo.
Un dos aspectos máis destacados desta edición é a recuperación do módulo de socorrismo, unha especialidade que o goberno local considera estratéxica debido ás dificultades que afrontan cada verán os municipios costeiros para atopar persoal cualificado para a vixilancia de praias e instalacións acuáticas.
O proxecto conta cun orzamento de 484.000 euros, financiado nun 60 % pola Xunta de Galicia a través do Programa Operativo do Fondo Social Europeo Plus (FSE+) Galicia 2021-2027.
O Concello asumirá a selección do alumnado e do persoal docente e administrativo, ademais de achegar as instalacións e facerse cargo dos gastos xerais do programa.
A convocatoria para seleccionar aos participantes publicarase nas próximas semanas.
Para optar a unha das prazas será necesario ter entre 18 e 30 anos e figurar inscrito no ficheiro do Sistema Nacional de Garantía Xuvenil en Galicia. A información sobre os requisitos e o procedemento de inscrición pode consultarse na oficina virtual de emprego da Xunta.
No caso do módulo de socorrismo, ademais da formación teórica e práctica, os alumnos realizarán tarefas de apoio xunto aos servizos municipais de Emerxencias e a Fundación de Deportes en labores de vixilancia e salvamento en espazos naturais e instalacións acuáticas municipais. Entre elas figuran a piscina do complexo deportivo de Fontecarmoa e as praias da Concha, Compostela, Preguntorio e Bamio.
A segunda especialidade do Labora Xove estará orientada á conservación e mantemento de parques, xardíns e espazos públicos naturais.
Os traballos desenvolveranse en distintos puntos do municipio, entre eles o xardín botánico Valdés Bermejo, os xardíns Doutor Fleming e Ravella, o parque da Xunqueira, A Coca, o parque da praia de Compostela, San Roque, o parque das Gaivotas de Sobrán, a Praza de España, as zonas verdes da Praza de Galicia, a Praza da Independencia, a rúa Arcebispo Lago e a avenida Rodrigo de Mendoza.
Engade Pontevedra Viva como fonte preferida de Google de balde
Mantente informado coas últimas noticias de actualidade.