Galicia reforza o dispositivo despregado para combater os incendios forestais que afectan a varias provincias de España co envío de máis de 60 profesionais do Servizo de Prevención e Defensa contra os Incendios Forestais (SPIF), ademais de helicópteros e medios terrestres.
A mobilización prodúcese despois de que o Goberno declarase a situación de emerxencia de interese nacional pola gravidade dos lumes.
O primeiro continxente galego partiu este xoves cara á provincia de León, onde xa traballan 14 profesionais, un bulldozer e unha motobomba.
Ao longo do venres ese operativo ampliouse cun helicóptero, unha brigada e dous axentes forestais.
O maior reforzo dirixiuse, con todo, ás comunidades de Madrid e Castela e León, en concreto ás provincias de Madrid e Ávila.
Até alí desprazáronse dous helicópteros, seis brigadas, catro axentes forestais, dous técnicos, un bulldozer e un posto de mando avanzado, con capacidade para mobilizar a preto de medio centenar de efectivos.
A Xunta subliña que este despregamento se realiza sen comprometer o operativo galego de prevención e extinción de incendios, que permanece plenamente operativo en plena campaña de alto risco.
O dispositivo autonómico continuará en situación de vixilancia mentres parte dos seus recursos colaboran nos labores de extinción fóra da comunidade.
Non é a primeira vez que Galicia presta apoio en grandes emerxencias por incendios forestais xa que, nos últimos anos, brigadas e medios galegos participaron en varios operativos noutras comunidades autónomas e mesmo en Portugal, como ocorreu durante a grave vaga de incendios rexistrada no país veciño no 2017.
A colaboración forma parte dos mecanismos de cooperación entre administracións para facer fronte a incendios de especial complexidade, que permiten mobilizar recursos de distintas comunidades cando a magnitude da emerxencia requíreo.
Engade Pontevedra Viva como fonte preferida de Google de balde
Mantente informado coas últimas noticias de actualidade.