Campelo está de parabéns. O seu evento máis emblemático, a Festa da Ameixa, vén de ser distinguida como festa de interese turístico de Galicia.
Así o acordou este luns o goberno galego. Foi durante a súa xuntanza semanal.
O Consello da Xunta aprobou ampliar o catálogo de festividades de interese turístico de Galicia coa aprobación de tres novas adhesións.
Ademais da Festa da Ameixa, lograron este recoñecemento a Romaría de Santa Minia, en Brión; e a Noite Meiga de Sarria.
A través desta declaración, a Xunta destaca a súa compoñente como iniciativas tractoras de turismo.
Recoñecen así a antigüidade e continuidade no tempo destas celebracións, así como a súa singularidade, impacto cultural e arraigamento na comunidade.
A Festa da Ameixa de Campelo celébrase en Poio cada ano dende 1988.
Esta celebración é, destacan desde a Xunta, "parte esencial da identidade cultural e a idiosincrasia propia" desta vila mariñeira cunha importante tradición marisqueira, que se remonta máis de 2.500 anos, ata a época castrexa.
Con estas novas adhesións, Galicia amplía o seu catálogo de festas de interese turístico ata máis de 140 celebracións.
Entre elas hai eventos culturais, gastronómicos, musicais, relixiosos e outras festividades e iniciativas con ampla capacidade de atracción de visitantes.