Campelo abre a súa Festa da Ameixa cunha emotiva homenaxe ás mariscadoras xubiladas

A Festa da Ameixa de Campelo levantou o pano este venres cun acto cheo de emoción e orgullo mariñeiro. O evento inaugural rendeu homenaxe a quen dedicaron a súa vida ao mar: as mariscadoras que se xubilaron durante o último ano, e que recibiron a Ameixa de Prata, un recoñecemento outorgado polo Concello de Poio.

A cerimonia estivo presidida polo alcalde, Ángel Moldes, acompañado da Conselleira do Mar, Marta Villaverde; o delegado da Xunta en Pontevedra, Agustín Reguera; a deputada provincial María Ramallo; ademais de membros da corporación municipal, representantes das confrarías, agrupacións de marisqueo e asociacións culturais, veciñais e deportivas de Campelo, así como empresas do sector.

Durante a súa intervención, Moldes destacou a importancia desta cita, considerada a festa gastronómica máis emblemática e con máis historia do municipio.

"Non só celebramos un produto excepcional como é a ameixa da nosa ría, senón que rendemos homenaxe a toda esa xente que vive co mar e para o mar", expresou o alcalde.

O recoñecemento da Ameixa de Prata foi entregado a mariscadoras das confrarías de Raxó, San Telmo e Lourizán, en agradecemento á súa dedicación: Argentina Rodríguez Torres, Justa López Pérez, María Soledad Amestoy Pintos, María Esther Casás Barral, Mercedes Castiñeira Buceta, Ana María Fernández Castro, Evangelina García Garrido, Ángel García Torres, Ignacio Moreira Curra, Dolores Pazos Torres, Cristina Rodríguez Ruibal, Luisa Tarela Martínez, Rosa María Villanueva Castiñeira, Pablo Laíño Cajide e Mª Rosa González Carabelos. 

"Mulleres e homes do mar que, co voso traballo incansable, facedes posible que un dos produtos máis emblemáticos da nosa ría chegue cada día ás nosas mesas. Sodes orgullo", engadiu Moldes.

A xornada tamén serviu para dar a coñecer aos gañadores do Concurso de Fotografía da Festa da Ameixa, organizado polo Concello e a Asociación Arela. O primeiro premio foi para Víctor Lorenzo Santiago, coa súa imaxe "Reflexos". O segundo lugar ocupouno Marisol Amestoy Pintos, con "Compañeiros en Acción", e o terceiro foi para Vanessa López Abal, con "Bailando ao anoitecer". Os galardoados repartíronse 600 euros en vales para material fotográfico.

E como non podía faltar, tras os actos institucionais chegou o momento máis esperado por moitos: a degustación. Os asistentes gozaron das primeiras racións de ameixas á mariñeira, con fideos e con arroz, mentres soaban as voces de Cantos da Terra e Bahía de Tambo no certame de Canción Mariñeira.

Pero a festa non termina aí. Durante o sábado e domingo, as casetas de degustación estarán abertas desde as 12:00 do mediodía, con actividades para todos os públicos. Ademais, o alcalde anunciou que a celebración continuará durante o mes de outubro, cunha xornada técnica para profesionais do mar e xornadas gastronómicas nos restaurantes de Poio.

"Queremos que esta festa sexa tamén un espazo de encontro, reflexión e promoción do produto durante todo o ano", explicou Moldes.