O vindeiro xoves 2 de outubro, a Casa Rosada de Poio será o punto de encontro para expertos, profesionais do mar, representantes das administracións e do sector hostaleiro, que participarán na Xornada Técnica da Ameixa.
Esta convocatoria está pensada para analizar o presente e futuro do marisqueo na ría de Pontevedra e pór en valor un dos seus produtos máis emblemáticos: a ameixa de Campelo.
Esta cita, organizada polo Concello de Poio e financiada pola Consellería do Mar a través do GALP Ría de Pontevedra, chega como complemento perfecto á 37ª edición da Festa da Ameixa de Campelo, que se celebrará do 26 ao 28 de setembro e cuxa programación completa se dará a coñecer nos próximos días.
Durante a xornada celebraranse charlas técnicas sobre xestión sostible dos recursos mariños, ademais dunha mesa redonda na que participarán mariscadoras, investigadores, técnicos e representantes institucionais.
Será un espazo de diálogo aberto, onde se abordarán os retos actuais do sector e exploraranse iniciativas conxuntas que xa funcionan noutros territorios.
Un dos momentos máis esperados será o showcooking en vivo, no que un chef especializado mostrará distintas formas de preparar a ameixa de Campelo, demostrando a súa versatilidade na cociña e o seu enorme potencial como ingrediente gourmet.
Unha degustación gastronómica porá o broche final a esta xornada que promete ser tan formativa como saborosa.
Durante a presentación do evento, celebrada este xoves na Casa Rosada, a concelleira de Urbanismo e Turismo, Rocío Cochón, destacou a importancia deste tipo de actividades para dar visibilidade ao traballo das mariscadoras, así como para fortalecer un sector que é clave para a economía e a identidade de Poio.
"Queremos que a Ameixa de Campelo sexa máis que unha festa dunha fin de semana, queremos tamén facer protagonista á xente do mar e a toda a cadea que leva ese produto da ría á mesa", sinalou a edil.
Cochón agradeceu o apoio constante do sector, representado pola presidenta do GALP e patroa maior de Lourizán, Mari Carmen Vázquez, e a xerente Laura Nieto, presentes no acto.
Tamén puxo en valor o respaldo da Xunta de Galicia, destacando que estas xornadas están deseñadas para reforzar o papel do marisqueo como motor económico, social e cultural da comunidade mariñeira de Poio.