Xa está en marcha unha iniciativa pioneira destinada a protexer e coidar os menores do municipio de Sanxenxo, segundo anuncia o goberno local. Trátase dun programa integral de Atención á Infancia e Adolescencia que busca ir máis aló das celebracións simbólicas para traballar de forma activa na prevención de situacións de risco.
A iniciativa foi presentada pola concelleira de Servizos Sociais e Maiores, Paz Lago, acompañada da educadora familiar municipal, Chus Casal, ante as representantes das asociacións de pais e nais dos centros educativos locais.
O novo programa estrutúrase arredor de catro liñas de actuación principais: prevención, sensibilización, participación e intervención. Esta estratexia integral nace do Servizo de Educación e Apoio Familiar (SEAF), que leva funcionando desde 1996 atendendo as dificultades que as familias enfrontan na educación dos seus fillos.
"Dende o Concello buscamos que o Día da Infancia, que se celebra o 20 de novembro, non se quede só niso, nunha efeméride sen máis", explicou Lago. A concelleira subliñou que o obxectivo é "fomentar o bo trato á infancia" mediante a creación de contornas seguras e protectoras.
A programación inclúe talleres dirixidos a familias sobre temas de especial relevancia. O primeiro deles, "Os teus fillos consomen porno: Que vas facer", celebrarase os días 20 e 21 de outubro no Auditorio Emilia Pardo Bazán.
Esta actividade estará a cargo do doutor en Psicoloxía José Luís Garcúa, especialista en Sexología cunha traxectoria de 36 anos como psicólogo clínico no Goberno de Navarra, autor de 16 libros e galardoado en oito certames oficiais.
O programa continuará con outros talleres especializados: "O noso fillo ten unha discapacidade. O meu irmán ten unha discapacidade", centrado no bo trato a menores con irmáns con discapacidade; "Delegado de protección", enfocado en crear espazos seguros no ámbito deportivo e de lecer; "Prevención de Violencia sexual na Infancia", que proporcionará ferramentas preventivas; e "A saúde emocional", dedicado ao coidado emocional dos menores.
A iniciativa xorde ante datos alarmantes que xustifican a necesidade de actuación. Segundo destacou Lago, un de cada cinco nenos sofre abusos sexuais, unha estatística que "non é para alarmarnos, pero si preocuparnos polo que está a pasar".
Con 2.420 menores que representan o 13,4% da poboación municipal, Sanxenxo maniféstase pioneiro no desenvolvemento de programas preventivos que van máis alá da intervención para traballar desde a base na protección da infancia e adolescencia.